Nuffnang

Friday, February 14, 2014

Mga Ideya sa Pagnenegosyo

Halos lahat tayo gustong magkaroon ng negosyo. Kagaya ng nabanggit ko dati ang pagnenegosyo ang isa sa pinakamabilis na paraan sa pagyaman. Kung mauumpisahan at mapapatakbo ng maayos ang isang negosyo, ito ay magsisilbing palabigasan ng pera sa haba ng panahon. Parang isang pato na nangingitlog ng ginto sa haba ng kanyang buhay. Kaya naman marami sa atin ang nag-aasam na makapagsimula ng negosyo dahil sa malaking premyo na maaaring maibigay nito sa ating buhay.

Dahil taos sa aking kalooban ang matulungan ka kabayan ko, ibabahagi ko sa iyo ang ilang mga ideya sa pagnenegosyo na maaari mong simulan ngayon. Sa bawat ideya idedetalye ko ang mga hakbang na kailangan mong gawin upang makapagsimula sa klase ng negosyong mababanggit. Hinihikayat kita na lawakan ang iyong imahinasyon at pag-isipan ng mabuti ang lahat ng mga ideyang ibibigay ko. Pagdesisyunan mo kung alin sa mga ideyang ito ang angkop sa iyong kalagayan at ito ay iyong simulan ng may buong sipag, tiyaga, at talino. Lahat ng mga ideyang mababanggit ay maaaring masimulan sa bahay at nangangailangan lamang ng kaunting kapital.

Panaderia

Ang tinapay ika nga ang panlaman nating mga pinoy sa tiyan. Hinding hindi mawawala ang pandesal sa almusal nating mga pinoy. Hindi lang ito pang-umaga, pang meryenda rin. Hindi mo kailangan maging isang propesyonal na panadero upang makapagsimula sa negosyong ito. Hindi mo rin kailangan ng mga gamit sa pag-gawa ng tinapay. Sa katunayan hindi mo kailangang gumawa ng tinapay upang mag-umpisa.

Ang kailangan mo lang gawin ay pumunta sa isang panaderia at bumili ng tinapay ng wholesale o pangmaramihan. Sa ganitong paraan mabibigyan ka ng malaking diskwento na maaari mong kitain sa pamamagitan ng pagbebenta ng tingi o indibidwal. Manghikayat ng mga tao na maaaring maglako at magbenta ng iyong mga tinapay. Bigyan sila ng sapat na kaalaman sa tamang pagpepresyo at pagtitinda ng iyong tinapay. Bigyan mo sila ng komisyon sa kanilang kabuoang benta.

Negosyo sa Pag-gawa ng Tsokolate at Kendi

Ang tsokolate at kendi ay mga paboritong pagkain ng mga bata at ng mga matatanda. Ang pag-gawa ng mga ito ay simple lamang at hindi nangangailangan ng teknikal na kaalaman at karanasan. Kung kaya mong magsaing ng kanin, kaya mo rin gumawa ng tsokolate at kendi. Ang isa sa mga mabentang kendi na hindi nawawala sa panahon ay ang yema. Haluan mo ang yema ng ibat ibang klase ng kulay o tsokolate upang maging kaayaaya ito sa paningin. Maaari mo rin itong lagyan o haluan ng ibat-ibang klase ng nuts o mani para makadagdag sa masarap na lasa nito.

Kausapin mo ang mga may-ari ng sari-sari stores sa iyong lugar at kumbinsihin sila na ibenta o ilagay ang iyong mga bagong lutong kendi sa kani kanilang tindahan. Bigyan mo sila ng porsyento sa bawat kendi na mabebenta. Sa ganitong paraan, mas malaki ang iyong tsansa na makabenta ng marami.

Pagdedeliver ng tanghalian

Lahat tayo ay kailangang kumain. Ang pagkain ay isa sa mga kailangan ng tao upang mabuhay. Kaya naman ito ay isang mainam na panimulang negosyo na maaari mong umpisahan ngayon sa iyong kusina. Mas mainam kung ikaw ay may kasanayan o kaalaman sa pagluluto. Kung wala naman, maaari kang magpatulong sa kapamilya o kaibigan na maaaring magluto para sa iyo.

Maghanda ka ng listahan o menu ng mga pagkain na sa iyong palagay ay magugustuhan ng ibang tao. Pumunta ka sa mga opisina ng gobyerno kagaya ng post office, munisipyo, baranggay hall, court house at lahat ng pampublikong opisina na malapit sa iyo at manguha ka ng order sa mga empledayo. Tandaan, dahil sa tanghalian ang iyong idedeliver, agahan ang iyong pangunguha ng order upang mabigyan mo ang iyong sarili ng sapat na oras upang makapagluto at makapagdeliver.

Iminumungkahi ko ang ganitong sistema upang maging mas madaling tantyahin ang iyong ilulutong kanin at ulam na kung saan malilimitahan ang iyong “overhead” o gastos sa pagnenegosyo. Matitiyak mo pa na mayroong siguradong customer na magbabayad sa iyong serbisyo at produkto.

Marami pa akong mga ideya sa pagnenegosyo na nais kong ibahagi sa iyo ngunit ang mga ito ay sadyang mahaba para sa isang blog post. Abangan ang susunod na listahan ng mga ideya sa pagnenegosyo sa susunod na artikulo. Sana nabigyan kita ng inspirasyon upang magsimula ng iyong sariling negosyo. Ito ay ilan lamang sa mga maraming ideya na kung pagtutuunan ng sapat na pag-iisip ay makakatulong sa iyo na makapagsimula ng isang kumikitang negosyo.

Pakinggan ang audio version:

Wednesday, September 4, 2013

Hindi Ka Payayamanin ng Gobyerno



Sa kabila ng kaliwa’t kanan at walang puknat na pagbatikos sa mga politiko at lider ng ating bansa, isa ang nananatiling totoo sa buhay nating mga Pilipino. Marami parin sa atin ang patuloy na nakakaranas ng kahirapan, gutom, at kawalan ng trabaho. Nakakalungkot mang isipin na ang ating Gobyerno na dapat gumagabay sa atin at nagbibigay ng oportunidad upang tayo bilang mga mamamayan ay umunlad sa buhay at magtagumpay ay siya pang numero unong nagbibigay ng masamang halimbawa sa atin. Hindi kailan man magiging tama ang patuloy na pagnanakaw ng mga opisyal ng Gobyerno sa kaban ng bayan. At alam nating lahat na ito ay hindi makatarungan at hindi patas para sa ating mga mamamayan.

Pero kung ilulugmok natin ang ating mga sarili sa mga problemang sosyal at politikal na ating kinakaharap ngayon, ang buhay natin ay hindi magiging matiwasay. Kung tayo ay patuloy na magpapaapekto sa mga bagay na wala tayong direktang kontrol, mawawalan tayo ng pokus sa pagpapaunlad ng mga bagay na mahalaga sa ating buhay katulad ng pag-iimpok ng pera, pagbibigay ng mga bagong kaalaman sa sarili, at pagbibigay sa sarili ng progresibong pag-uugali at positibong pananaw sa buhay. Huwag mong hayaan maging hadlang sa iyong pag-unlad ang mga problema ng atin bansa. Pakialaman at pag-aralan mong mabuti kung papaano mo mapapaunlad ang iyong pansariling ekonomiya.

Ang mga naririnig mo sa radyo at mga napapanood mo sa TV, maniwala kaman o hindi ay nagbibigay ng negatibong epekto sa iyong pangkalahatang pamumuhay. Ayon sa pag-aaral kakaunti lamang ang porsyento ng mga positibong mensahe na makukuha natin sa panonood ng telebisyon. Ibig sabihin halos lahat ng mga ipinapalabas sa TV lalo na sa mga News Channels ay negatibo at nakakasama sa atin. Kapag napuno ang iyong pag-iisip ng mga negatibong mensahe ano sa palagay mo ang mangyayari? Ikaw ay makakaranas ng tinatawag na “End of the World syndrome.” Ikaw ay magkakaroon ng biglaang takot, mawawalan ka ng seguridad at kumpiyansa sa sarili. Mararamdaman mo na ang mga pangyayari sa paligid mo ay hindi sumasangayon sa iyong kagustuhan at bigla mong mararamdaman ang tensyon sa iyong buong katawan. Magkakaroon ka ng matinding pananakit ng ulo na posibleng mauwi sa malubhang sakit.

Kaya naman ang payo ko sa iyo kaibigan ko. Tigilan o kaya naman ay bawas bawasan mo na ang panood ng TV at pakikinig sa radyo na may kaugnayan sa kasalukuyang problema ng ating bansa o ng mundo. Wala kang direktang kontrol sa ano mang bagay na nagaganap sa labas ng iyong personal na buhay. Sanayin na magbasa ng mga libro na magbibigay sa iyo ng karagdagang kaalaman sa pagpapaunlad ng sarili. Magbasa ng mga aritikulo o blog na katulad nito na humihikayat na mag-isip ng positibo at nagbibigay ng makabuluhang payo na iyong magagamit upang mapaunlad ang iyong pamumuhay.

Ang higit ko rin na isinusulong at pinapayo sa lahat ng aking mga taga-basa ay ang madalas na pagbuklat at pagbabasa ng Biblya. Ang Banal na Sulat ay nagbibigay sa atin ng mga magaganda at dakilang payo na ating magagamit sa ating pang araw-araw na buhay. Ito ay nagbibigay ng walang hanggang gabay sa ating buhay at humihikayat na mamuhay na naaayon sa utos ng Diyos at sa buhay ni Hesukristo. Dahil nasasabi sa Biblya na “Sapagkat sa ganitong paraan inibig ng Diyos ang sanlibutan kaya ipinagkaloob niya ang kaniyang bugtong na Anak upang ang sinumang sumampalataya sa kaniya ay hindi mapahamak kundi magkaroon ng buhay na walang hanggan." –Juan 3:16 SND